Бөлүмдөр
Дүйшөмбү, 19-ноябрь
Ысык-Көл облусуАк-Суу району 15.10.2018 10:37

Ак-Сууда үй-бүлөлүк дарыгерлер тобуна А.Молдакуновдун ысымы ыйгарылды (фото)

Turmush -  Ак-Суу районунун Боз-Учук айыл өкмөтүнүн Ново-Вознесеновка айылындагы «Ак тилек» үй-бүлөлүк дарыгерлер тобуна дарыгер Акматбек Молдакуновдун ысымы ыйгарылды. Бул тууралуу аймактык кабарчы билдирди.

Салтанаттуу иш-чарага райондук мамлекеттик администрациянын, айыл өкмөттүн, райондук үй-бүлөлүк медицина борборунун өкүлдөрү, дарыгер Акматбек Молдакуновдун жакын туугандары, кесиптештери катышты.

Анда бул инсан көп жылдар бою дарыгер, клиникалык оорукананын жетекчиси, «Ак тилек» үй-бүлөлүк дарыгерлер тобунун жетекчиси болуп эмгектенгендиги тууралуу кесиптештери, туугандары, достору эскеришти, анын өмүр баяны тууралуу слайд да көрсөтүлдү.

Молдакунов Акматбек Касымович 1948-жылы Ак-Суу районунун Ичке-Жергез айылында туулган. Ата-энеси жолдомо менен Ново-Вознесеновка айылында мугалим болуп иштешкен. Ал аталган айылдагы орто мектепте билим алган. Андан кийин ошол кездеги Фрунзе шаарындагы Кыргыз мамлекеттик медициналык институтун аяктап, врач-терапевт адистигине ээ болгон.

Окууну аяктагандан кийин туулган жерине кайтып, Ак-Суу районунун бар катар айылдарында башкы дарыгер кызматтарында иштеп, элет элинин саламаттыгын сактоого зор салым кошкон. Ал РФнын Кемерово шаарында 6 айлык рентгенолог дарыгери окуусуна жиберилип, кийин ак-суулуктарга ушул багытта да кызмат кылган. Элеттик дарыгер облустук жана Россия Федерациясынын Ардак грамоталарына татыган. Ал 2015-жылы көз жумган. Артында 1 уулу, 4 кызы, 12 небереси бар.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
×